Uncategorized

Kya Yehi Aazadi hai?

Har mod par zindagi ek naya sabaq deti. Aaj phir itne qareeb se maut ka manzar apni aankhon se dekh kar ye ehsaas hua ke haqeeqatan maut hi zindagi ki haqeeqat hai. Kya aapne dekha hai wo lamha jab insan ka dam nikalta hai? Yun to insaan daawe karta hai ke use apni zindagi pe mukammal ikhtiyaar haasil hai lekin Kya sach mein aisa hai. Is that really true?

Zindagi pe kab kisi ka ikhtiyar hai ye koi dekhna chaahe to dekhe kisi aise shakhs ko jo maut aur zindagi se jang lad raha ho apni aakhri saanson ke liye, jab saansen oopar neeche hoti hain aur dhadkanon ki raftaar dheemi hote hote ruk jaati hain. Wo khud bhi naakam ho jaata hai aur aakhirkaar jaan haar jaata hai, aur koi shakhs aisa nahin hai is duniya mein jo us aakhri lamhe ko chand pal ya ghadiyon ke liye hi rok sake use taalna to door ki baat hai.

Jab maut ka wo lamha aa jaae tab insaan ko apni bebasi aur laachaari ka ehsaas hota. Jo Marne waala hai wo bhi bebas hota hai aur jo zinda hain wo bhi bebas hain ke na uski saason ko dobara la sakte hain na dil ki dhadkanon ko rukne se bacha sakte hain.

Yun to badi taraqqi kar li science ne lekin na hi koi maut ki wajah dhoond saka ke har insaan ko maut aakhirkaar aati hi kyon hai, na maut ka koi ilaaj dhoond saka. Kya itna hi ikhtiyaar hai humen zindagi par, ke apni jaati hui saansen, waapas nahin la sakte, apne dil ki dhadkanen tham jaane ke baad unko dobara la nahin sakte?

“My life My Rules” kehne waale zindagi ke is rule ko to nahin badal sakte. Jab apni zindagi hai to karen phir is baare mein bhi kuch. Na apni marzi se yahan aae na apni marzi se yahan se jaanege. Apni marzi ki har cheez awwal to paana mushkil hai aur agar mil bhi jaae to is baat ki koi guarantee nahi ke khush bhi rahenge. Na khushi apne khtiyaar mein aur na hi gham par. Na apni badhti umar ko rok sakte hain, na aane waale waqt ko rok sakte hain na guzra hua waqt waapas la sakte hain, na beemaari se bach sakte hai, na maut se bach sakte hain.

Kya waaqai mein insaan apni marzi kar paata to kya wo apne azeezon ko khud se juda hone deta? Aur nahin to phir AAZADI kahan hai?

Jab kuch kar nahin sakte to kis baat par hum ye sochte hain ke humaari zindagi hai hum jo chaahe wo karen.

Humaare nazariye se to zindagi kuch nahin bus chand gini chuni saansen aur chand lamhe. Aur har ek ka lamhe ka poora poora hisaab dena hoga. Zindagi to darasal Allah Taala ka inaam hai hum par, chand mushkilaat zaroor hain lekin un mushkilaat par sabar karne par jannat ka yaqeeni taur par waada hai Allah Rabbul Izzat ka. Aur jo Allah ne keh diya bus bila shuba wohi haq hai, wohi sach hai. Ek din muqarrar hai jab Uske aage haazir hona hai.

Ae Allah humen ye zindagi apne bataae hue tareeqe par chalne ki taufeeq de, seedhe raaste par chala, humen apni marzi ke mutaabiq bana le, apne pasandeeda bandon mein shaamil kar le. Ae Allah marte waqt humari zubaan par kalma jaari ho. Hum se aasaan hisaab lena. Allahumma hasibna hisaaban yaseera. Aameen

Kya isi ko mukammal ikhtiyar kehte hain? Kya yehi aazadi hai? Aapka kya khayal hai is baare mein zaroor bataaen.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s