Gulshan Ki Faqat Phoolon Se Nahin

Gulshan ki faqat phoolon se nahin kaaton se bhi zeenat hoti hai,
jeene ke liye is duniya mein gham ki bhi zaroorat hoti hai.

Wo pursish-e-gham ko aae hain kuch keh na sakoon chup reh na sakoon,
khaamosh rahoon to mushkil hai keh doon to shikaayat hoti hai.

Karna hi padega zabt-e-alam peene hi padenge ye aansu,
fariyaad-o-fughaan se ae naadaan tauheen-e-mohabbat hoti hai.

Jo aake ruke daaman pe ‘Saba’ wo ashq nahin hai paani hai,
jo ashq na chhalke aankhon se us ashq ki keemat hoti hai.
Written by Saba Afghani

Aaj yunhin khayal aaya ke ye ghazal share karen aap sab se. This is not complete, 2nd paragraph nahin hai is mein. Waise to saari ghazal bohot hi khoobsurat hai lekin ye wali line to humari favourite hai… “wo pursish e gham ko aae hain kuch keh na sakoon chup reh na sakoon…” Kis khoobsurati se shayar ne kuch na keh kar bhi bohot kuch keh diya, gila kiya kar bhi diya aur nahin bhi.

Kai baar aisa hota hai ke koi aap se haal ehwaal maaloom kare ya koi sawal kare to haalat ya baat hi kuch aisi hoti ke jawaab mein kuch kehna bhi mushkil hota hai aur khamosh rehna to us se bhi kahin zyaada bhi mushkil hota hai… zabt karna padta hai… zabt karna aasan nahin hota bohot hi zyada mushkil kaam hai…

Oho! Aur aakhri do ashaar ki to baat hi kya hai.