Urdu Poetry

Apni Marzi

Binte Bashir via Canva

“Apni marzi se kahan apne safar ke hum hain

Rukh hawaaon ka jidhar ka hai udhar ke hum hain

Pehle har cheez thi apni magar ab lagta hai

Apne hi ghar mein kisi doosre ghar ke hum hain

Waqt ke saath hai mitti ka safar sadiyon se

Kisko maaloom kahan ke hain kidhar ke hum hain

Chalte rehte hain ke chalnaa hai musaafir ka naseeb

Sochte rehte hain kis raahguzar ke hum hain

Hum wahan hain jahan kuch bhi nahin rasta na dayar

Apne hi khoe hue shaam-o-sahar ke hum hain

Gintiyon mein hi gine jaate hain har daur mein hum

Har qalamkaar ki benaam khabar ke hum hain – Nida Fazli

Kai baar zindagi mein hum bohot kuch sochte hain bohot kuch chaahte hain magar ya haalaat mukhaalif hote hain ya sab kuch soch se bilkul ulat hota hai. Apni zindagi bhi ek badbani kashti ki tarah hai jo haalat ki ravish par aage badhti hai. Kab zindagi mein wo hota hai jo insaan chaahta hai. Hum itni lambi lambi taweelen karte hain, plans banaate hain ke ye karna hai wo karna hai, ye chaahiye aur ye nahin lekin aane waala lamha hi tae karta hai ke hona kya hai.

Itne saare aur itne confusing khayalaat zehen mein aa rahe the bohot kuch likha aur mitaaya, phir likha aur phir mitaaya ye soch kar ke padhne wala pareshaan na ho jaaen.

Khair, Nida Fazli ki ye dil ko choo jaane waali ghazal har us lamhe ke naam jab hum sochte kuch hain aur hota kuch hai, chaahte kuch hain aur milta kuch hai aur jab mil bhi jaae to aage wo hota nahin jo humne socha hota hai. Baharhaal apni marzi to hoti hi nahin.

Hamd Baari Taala, Motivational, Urdu Poetry

Khizaan Mein Bhi Shukr-e-Khuda

Binte Bashir via Canva

Pichli martaba jab garmiyon ki chutti mein Ammi Daddy ke ghar gae tab Daddy ki tabiyat bohot zyada kharab thi, aur unse log aksar phone par ya ghar aate the haal chaal maaloom karne ke liye. Daddy ka ek andaaz hai ke har baat par ek sher sunaate hain. Baharhaal kisi ne daddy ki tabiyat poochi to us par Daddy ne Allah ka shukr kiya aur ye khoobsurat sher sunaaya.

“Ae bulbulon khizaan mein bhi Shukr-e-Khuda karo,

Tinke kahan se laaoge fasl-e-bahaar mein”.

Binte Bashir via Canva

In do ashaar ne to jaise zindagi ki har takleef aur mushkilaat ko dekhne ka nazariya hi badal diya. Aur sach hai ke humen siwa maayoosi bhari baaten karne ke, pareshan rehne ke aur pareshani zaahir karne ke alaawa koi kaam nahin.

Jahan koi pareshaani aati nahin hai ke hum Allah ki di hui tamaam nematen bhool jaate hain, wo nematen jo Wo hamesha deta raha aur ab bhi de raha hai aur shikwe shikaayaton ke ambaar laga dete hain, aur nashukri ki baaten karte hain ke humaare saath to hamesha aisa hi hota hai.

Hum sirf ye dekhte hain ke kya nemat Us ne hum se le li ye nahin dekhte ke kya de raha hai aur aage bhi dega In Sha Allah. Kyon ke banda apne Rab ko waisa paata hai jaisa ke uska gumaan hai.

Ae Allah Tujh se dua hai ke hum Tujh se badgumaan aur badzan na hon, humen taufeeq de ke Teri di hui tamaam nematon ko pehchaanen aur Tere shukshukr guzaar banen.

Rabbi awzi’ni an ashkura ni’matak-allati an’amta ‘alayya wa ‘ala walidayya wa an amal salihan tardahu wa aslih li fi dhurriyati

Translation: Ae mere Rab! mujhe taufeeq de ke main Teri is nemat ka shukr ada karoon jo Toone mujh par aur mere walidaen par ataa farmaai aur ye ke aisa nek amal karoon jis se Tu raazi hojaae aur mere liye meri aulaad ki islaah farma de.

I hope that you all enjoyed reading this post.

Please feel free to share your thoughts.