Kya Kabhi Hum Apne Dil Aur Niyaton Ka Jaaeza Lete Hain?

Insaan ko hamesha apni niyat ka jaaeza lena chaahiye kyon ke har amal ka daadomadaar niyat par hai. Lekin kya hum waaqai aisa karte hain? Kabhi is baat ka khayal bhi nahin aata humen. Hum to bus ek ajab andaz mein apni zindagiyaan guzaarte chale ja rahe hain.

Har amal ya to sahi hota hai ya ghalat (koi aisa amal jis se Allah Taala raazi nahi). Amal sahi hai to theek aur nahin to ye samajh jaaiye ke jo hum karne ja rahe hain is se hum Allah ko naraz karenge.

Kisi bhi kaam ko karne se pehle apne dil aur niyat ka jaaeza achi tarah se lena bohot zaroori, balke kaam karne ke dauraan bhi jaaeza len apne dil ko achi tarah tatolen. Kahin aisa to nahi ke jo kaam hum karne ja rahen hain sirf dunya ke dikhaave ke liye to nahin hai?

Yun samajhna ke hum acha kaam kar rahe hain lekin dar-asal wo ghalat niyat ki wajah se neki zaaya ho rahi hai. Har kaam ke ikhtetam par bhi jaaeza len kyon ke baaz auqaat aisa hota hai ke hum shuru se aakhir tak nek niyat rakhte hain lekin ain waqt par dil mein apni badaai ka khayal aata hai ke “oho! I’m great humne to ye kar diya”. Dar asal badaai to tamaam Allah ke liye hai. Har amal kar ke ye sochen ke kya humne jo kiya sahi tha ya ghalat. Ghalat tha to use kisi tarah se durust karen aur agar sahi kaam kiya ya nek kaam kiya To dil mein bajaae fakhr aur takabbur ke ye khayal laaen ke jo bhi nek amal humne kiya ye Allah hi ki di hui taufeeq se hai.

Is se insaan na sirf Allah ka shukr guzar bhi banta hai balke takabbur se bhi bach jaata hai aur Allah us se raazi rehta hai. Aur jis se Allah raazi, Allah tamaam makhlooq ko us par mehrbaan kar deta hai aur humaare aam chote chote kaamon ko humaare naama-e-aamal mein neki likh deta hai.

Humen chaahiye ke Qadam qadam par apni niyat ka jaaeza lete rahen aur har chote chote amal ko ibaadat bana Len.

Allah Taala humaari niyat ko khaalis karde. May Allah make our intentions pure simply for Him. Aameen.

Please feel free to share your thoughts on this article.