Hamd Baari Taala, Motivational, Urdu Poetry

Khizaan Mein Bhi Shukr-e-Khuda

Binte Bashir via Canva

Pichli martaba jab garmiyon ki chutti mein Ammi Daddy ke ghar gae tab Daddy ki tabiyat bohot zyada kharab thi, aur unse log aksar phone par ya ghar aate the haal chaal maaloom karne ke liye. Daddy ka ek andaaz hai ke har baat par ek sher sunaate hain. Baharhaal kisi ne daddy ki tabiyat poochi to us par Daddy ne Allah ka shukr kiya aur ye khoobsurat sher sunaaya.

“Ae bulbulon khizaan mein bhi Shukr-e-Khuda karo,

Tinke kahan se laaoge fasl-e-bahaar mein”.

Binte Bashir via Canva

In do ashaar ne to jaise zindagi ki har takleef aur mushkilaat ko dekhne ka nazariya hi badal diya. Aur sach hai ke humen siwa maayoosi bhari baaten karne ke, pareshan rehne ke aur pareshani zaahir karne ke alaawa koi kaam nahin.

Jahan koi pareshaani aati nahin hai ke hum Allah ki di hui tamaam nematen bhool jaate hain, wo nematen jo Wo hamesha deta raha aur ab bhi de raha hai aur shikwe shikaayaton ke ambaar laga dete hain, aur nashukri ki baaten karte hain ke humaare saath to hamesha aisa hi hota hai.

Hum sirf ye dekhte hain ke kya nemat Us ne hum se le li ye nahin dekhte ke kya de raha hai aur aage bhi dega In Sha Allah. Kyon ke banda apne Rab ko waisa paata hai jaisa ke uska gumaan hai.

Ae Allah Tujh se dua hai ke hum Tujh se badgumaan aur badzan na hon, humen taufeeq de ke Teri di hui tamaam nematon ko pehchaanen aur Tere shukshukr guzaar banen.

Rabbi awzi’ni an ashkura ni’matak-allati an’amta ‘alayya wa ‘ala walidayya wa an amal salihan tardahu wa aslih li fi dhurriyati

Translation: Ae mere Rab! mujhe taufeeq de ke main Teri is nemat ka shukr ada karoon jo Toone mujh par aur mere walidaen par ataa farmaai aur ye ke aisa nek amal karoon jis se Tu raazi hojaae aur mere liye meri aulaad ki islaah farma de.

I hope that you all enjoyed reading this post.

Please feel free to share your thoughts.

Family

Wo Khud Rukhsat Hogaya

Binte Bashir via Canva

Jab koi apna duniya se jaata hai, dil mein ek khalaa sa kar jaata hai. Dil toot ke reza reza hoke reh jaata hai, har taraf veeraaniyaan chaa jaati hain. Har baat mein uski yaad, har mehfil mein uski kami. Dil pareshaan sa ho ho ke reh jaata, Har aahat par uske aane dhadka laga rehta hai. Dil kahin chain nahin paata. Shaakh se toote hue phool ki tarah murjhaya hua mehsoos karte hain khud ko.

Chaahen logon ki bheed mein bhi aap honge tab bhi khud ko tanha ho mehsoos karte hain. Duniya adhoori si lagti jab achaanak aapke darmiyaan se wo insaan aapki aankhon ke saamne bus achaanak maut ki aaghosh mein hamesha ke liye so jaata hai.

Kaisa lagta hai soch kar bhi ke wo shakhs jis se hum itni mohobbat karte hain ab wo kabhi dobara laut kar nahin aaega, hum use dobaara kabhi zindagi mein dekh nahin paaenge. Wo walid ab nahin raha.

Binte Bashir via Canva

Waalid wo hasti hai jo ek ghane saayadar darakht ki maanind apne bachon ko har mausam se bachata hai, garmi ki tapish se, baarish paani se aur haalat ki aandhi se. Jis ki chaaon mein humen badalte mausam, badalte haalat ka pata bhi nahi chalta.

Jisne baaghbaan ki tarah humen sambhaala, phoolon ki tarah naazon se paala. Ek aah si dil se nikalti hai “Ab tere phool kahan jaaen?”🥀🥀🥀🥀

Wo ek khwaab o khayaal ban kar dil mein reh gaya. Humne wo hasti ganva di jo humaare ghar ka sutoon tha. Jis ke hone se ghar ghar lagta tha. Waalid ke na hone se saara ghar bikhar jaata hai.

Wo hasti jisne hum par apni belaus mohobbbat lutaa di, Wo shakhs ab nahin raha jisne humen har talkeef se bachaaya. Jo kuch wo kar sakta tha, jo uski istitaat mein tha usne kiya.

Jisne humaari khushi ke liye din raat kadi mehnat ki apna khoon paseena ek kar diya. Unke paseene ki ek boond ka haq bhi hum ada kar nahin sakte. Jinke paas dene ko kuch ho ya na ho duaaon ka khazaana hota hai.

Khaali rehti ab jagah unki, har cheez, har baat mein, har jagah mein hai unki kami. Dil ab bhi dhoodta wohi pyaar bhari aawaaz, wo zordaar daantna jise hum samjhe nahi ke pyaar se bharpoor tha, us daant ka har lafz ab sunne ko taraste hain.

Ab har lamha har manzar aankhon mein qaid hai. Yaad aati wo hansi wo qahqahe, lekin haae afsos ab kahan… ab wo nahin rahe. Ab kuch bhi nahin hai waisa… Mera waalid nahin raha

Dil yaad kar kar ke rota hai. Aankhen har jagah dhoodti dhoondti hain, dobara dekhne ko tarasti hai. Yaad aata hai sab kuch, rukhsati ka wo lamha bhoola nahin phir ek baar lipat ke rone ko ji chaahta hai.

Mehez alfaz wo dard bayan nahin kar sakte jo dil mein chupa hai.💘 💔🥀

Wo khud rukhsat hogaya jinse ek dard bhare dil se, apne aansuon ko sab se chupaakar humen ghar se rukhsat kiya. Dil se ek aah nikalti hai, wo khud rukhsat hogaya jisne humen rukhsat kiya!

Binte Bashir via Canva


I don’t know the name of this poet

Salaam hai har Waalid par jo khushi khushi apne bachon ki khaatir apni har khushi qurban kar dete hai, khaali daaman hi sahi dil se duaaen dete hain.

Aaj ki ye post un tamaam bachon ke naam jinke Waalid is duniya mein nahin rahe.

Share it if you like it.